Tanzia

“Nimepokea kwa mshtuko mkubwa taarifa za kifo cha Mh:Kassid Seleman Likacha Diwani wa Viti maalum nimeshtuka sikutegemea wala kuwaza maneno aliyoniambia kuwa leo tarehe 27/07/2018 kuwa nisisafiri wala kutoka nje ya Jiji badala yake nikamchukue nimpeleke hospitali”.

Marehemu Mh; Kassid enzi za uhai wake.

Haya ni maneno aliyoyasema Mstahiki Meya wa Manispaa ya Temeke Mh. Abdallah Chaurembo kwa masikitiko makubwa wakati wa kutoa salamu za pole kwa wafiwa na kufanya umati wa waheshiwa Madiwani pamoja na wakuu wa idara kushindwa kujizuia na kutoa machozi wakati wa dua ya kumuombea marehemu ilipokuwa ikifanyika katika ukumbi wa mikutano wa Idd Nyundo katika Manispaa ya Temeke.

                                  Mwili wa Mh:Kassid ukiwa katika ukumbi wa Iddi Nyundo ili kuagwa. 

Akimuelezea marehemu, alibainisha kuwa alikuwa mtu wa watu anaetambua wajibu wake na kubwa zaidi ambalo litaacha pengo ni ile hali ya kuwa mpatanishi pindi panapoitajika ndani ya Chama cha Mapinduzi ama nje ya chama.

Mh:Kassid ni mtu wa watu hana makuu, ni mchapakazi anaejitambua na kutambua wajibu wake kwa serikali na kwa wananchi anaowahudumia.Nimeguswa sana na msiba huu kwakuwa siku chache zilizopita tulipatwa na msiba mwingine wa Diwani wa viti maalum katika Manispaa ya Kigamboni ambao ni majirani zetu kabisa.

      Pichani marehemu enzi za uhai wake akiwa katika kutekeleza majukumu yake.


Akisoma wosia wa marehemu,walibainisha kuwa marehemu Kassid akizaliwa tarehe 26/06/1969 na alibahatika kupata elimu ya Msingi na Sekondari pia alikuwa mjuzi katika fani ya biashara na ujasiriamali.

Pamoja na hayo katibu Tawala wa Wilaya ndug:Hashim Komba alisema Mh:Kassid ameacha pigo kubwa sana katika chama cha Mapinduzi na kamwe hawezi kutoka katika fikra kutokana na kujituma kwa wakati wote katika majukumu yake.

“Nina uchungu usio na kifani, kwani wiki chache za nyuma nilikwa nae katika majukumu ya kazi na tulipanga mikakati mingi ya kimaendeleo na kuahidi kulinda heshima ya Chama na kupiga hatua mbele zaidi ,kumbe Mungu anamipango mingi kuliko wanadamu, leo Kassid umelala hutaamka tena ila naahidi nitalinda na kutimiza mambo yote ya kazi tuliyokubaliana na kuyapanga” alisema Komba.

Marehemu alikuwa Diwani wa viti maalum kwa tiketi ya Chama Cha Mapinduzi tangu mwezi Oktoba 2015 hadi mauti ilipomfika tarehe 26/07/2018 katika Hospitali ya Temeke alipokuwa akipatiwa matibabu.