TEMEKE KUTOA CHANJO YA KUZUIA SARATANI YA SHINGO YA KIZAZI KWA WASICHANA 6,721

Mkuu wa Wilaya ya Temeke Mh. Felix Lyaniva afanya uzinduzi utoaji wa chanjo ya kuzuia saratani ya mlango wa kizazi katika shule ya sekondari Charambe ambapo zaidi ya watoto 40 wamechanjwa.

Chanjo hii itachanjwa kwa watoto wenye umri wa miaka 14 kwa awamu ya kwanza, ambapo mpango wa kuwachanja mabinti wote wa kuanzia umri wa 9-14 itafanyika kwa mwaka 2019.

Uzinduzi huo uliudhuriwa na wadau mbalimbali akiwemo diwani wa kata ya Mianzini Mh:Abdallah Kipende,wataalam kutoka Wizara ya Afya,wataalam wa Afya kutoka Manispaa,kamati ya ulinzi na usalama ya Wilaya ya Temeke pamoja na viongozi wa dini.

Lyaniva alitoa shukrani zake kwa Rais wa Jamuhuri ya Muungano wa Tanzania kwa juhudi zake za kuleta mabadiliko katika sekta ya afya hususani afya za akina mama.Alisema '' serikali imetumia gharama kubwa kutoa chanjo hii hivyo wazazi,walezi na jamii nzima tuhakikishe wasichana wenye umri wa miaka 14 wanapata chanjo kwa awamu zote mbili bila kukosa''.

Lyaniva aliongeza chanjo hii itapunguza wimbi la maambukizi ya saratani ya shingo ya kizazi katika taifa letu hivyo wazazi msipuuze.

Akitoa somo kwa wanafunzi hao juu ya saratani,mwakilishi kutoka Wizara ya afya Bi. Zuhra Mkwizu aliwataka wanafunzi wasiwe na hofu kwani chanjo hiyo ni salama na haina madhara kabisa.

Alisisitiza kwamba Chanjo hii imethibitishwa kitaifa na  kimataifa na  imethibitishwa na shirika la afya Duniani (WHO).

"Chanjo hii ni salama na haina madhara kabisa hivyo kuwataka baada ya miezi sita kurudia chanjo ya pili ili kukamilisha dozi kamili"

Nao viongozi wa dini walipata wasaa wa kuwausia watoto hao, namna ya kujilinda na kujichunga dhidi ya maambukizi ya saratani ya mlango wa kizazi kwa kuepuka ngono zembe,kuacha tamaa.Huku wakitolea mifano katika vitabu vitakatifu jinsi vinavyokataza kuacha anasa na dhambi.

Chanjo hii ilizinduliwa na Makamu wa Rais kitaifa katika viwanja vya Mbaragala Rangi tatu na kwa sasa inaendelea kutolewa katika maeneo mbalimbali nchini.

Katika Wilaya  ya Temeke chanjo hii itatolewa katika vituo 274,ambapo vituo 197 ni mashuleni na vituo 77 ni katika vituo vya afya.Takribani wasichana 6,721 wanatarajiwa kupata chanjo ya saratani ya shingo ya kizazi.Ambao itajumuisha idadi ya wale waliopo mashuleni na nyumbani.

HAPPY MUUNGANO 2018

Mkuu wa wilaya Temeke ahimza wakandarasi kufanya kazi kwa wakati.

TIMU YA UKAGUZI YAKAGUA SHULE YA SEKONDARI KURASINI

Timu ya ukaguzi ya athari zitokanazo na mvua toka Halmashauri ya Manispaa Temeke imetembelea shule ya Sekondari Kurasini iliyozungukwa na maji kufatia mvua zinazoendelea kunyesha.

Timu hiyo ikiongozwa na Afisa Elimu Sekondari Ndg:Donald Chavila ilipokelewa na uongozi wa shule imejionea maji yaliyotuama katika shule hiyo nakukosa mwelekeo baada ya mvua kubwa kunyesha tangu siku ya Jumamosi.

Baada ya ukaguzi wa shule timu ilikubaliana kuchua hatua za awali za utoaji maji ili masomo yaendelee.Hatua za haraka ambazo zimechukuliwa ni pamoja na kumwaga dawa yakuzuia magonjwa ya mlipuko.Kuzibua na kuongeza kina cha maji katika mtaro wa awali.Hata hivyo Halmashauri ya Manispaa ya Temeke imepanga kuboresha mtaro huo kwa kuujenga kwa zege.

Katika hatua nyingine Mkuu wa shule ya Sekondari Kurasini Mwl; Florentina Asanga aliweka wazi tatizo hilo kujirudia kila msimu wa mvua ufikapo.Hivyo ameupongeza uongozi mzima wa Halmashauri kupitia Mkurugenzi mtendaji Ndg:Nassibu Mmbaga kwa kuonesha nia ya kutokomeza tatizo hilo katika shule yake.      

HALMASHAURI YA MANISPAA YA TEMEKE YAFANYA ZIARA KUKAGUA MIRADI YA MAENDELEO.

Kaimu Mkurugenzi Manispaa  ya Temeke Ndg. Prim Damas kwa kushirikisha wakuu wa idara na vitengo wafanya ziara kukagua miradi ya maendeleo katika Manispaa  hii. Katika ziara hiyo iliyofanyika maeneo ya Kijichi, Mbagala Kuu, Mianzini, Keko,Mibulani, Buza ,Yombo  vituka,Sandali  na Temeke .

 Ziara hiyo ya siku mbili imefanikiwa kupitia maeneo yote ya miradi  ya Dar es Salam Metropolitan Development Project ( DMDP) pamoja na ya Manispaa na kujiridhisha na utendaji  kazi  licha ya changamoto ya mvua inayoendelea katika maeneo mengi hapa Jijini.

Miradi hiyo itawanufaisha wananchi wa maeneo yanayozunguka miradi hiyo hivyo kuwaondolea changamoto mbalimbali ambazo zilikuwa zikiwakabili kabla ya kufikiwa na miradi hiyo.Amebainisha hayo kaimu mkurugenzi  na kuwataka watumie fursa ya kujipatia ajira kupitia miradi hiyo.

Miradi hiyo ni barabara ,madaraja,vituo vya afya,masoko,vituo vya usafiri , vyumba vya madarasa pamoja na miradi ya maji safi. Mf. kata ya Sandali barabara ya Mchicha yenye urefu wa km. 1.8 ambayo imegharim Tsh. 2.7 bilioni pia soko kubwa la kisasa linalojengwa katika kata ya Kijichi lenye uwezo wa  kubeba wafanyabiashara  zaidi ya 300, soko hilo limegharimu kiasi cha Tsh. 352 bilioni pamoja na kituo cha usafiri kitakachojengwa karibu na soko hilo ili kurahisisha huduma za kijamii.

Aidha katika hatua nyingine Ndg.Damas amewataka wahandisi kuhakikisha wanamaliza kazi walizopewa kwa wakati ili wakazi wa maeneo husika wapate kunufaika nazo. Aliongeza kwamba ''hii yote ni kuhakikisha tunaendana na kasi ya awamu ya tano ya  kufikia maendeleo''.

Aliagiza wananchi wote wanufaika wa miradi hiyo kuhakikisha wanatunza maeneo hayo na miundombinu yote ya miradi pale ujenzi utakapokamilika na kuhakikisha kodi na tozo zote zinalipwa kwa wakati.

Huu ni mwendelezo wa ziara ya Kaimu Mkurugenzi Damas  ambayo itahusisha Madiwani katika siku zijazo.

CHANJO YA SARATANI YA KIZAZI BURE

Makamu wa Rais wa Jamhuri ya Muungano wa Tanzania Mhe. Samia Suluhu Hassan amesema kuanzia sasa chanjo ya saratani ya shingo ya kizazi itatolewa burea.

Makamu wa Rais ameyasema hayo wakati akizindua chanjo ya Saratani ya Shingo ya kizazi kitaifa katika viwanja vya Zakhiem Wilaya ya Temeke mkoani Dar es Salaam.

Mama Samia amebainisha kuwa Serikali inapambana kuhakikisha Afya ya mwananchi inalindwa na kuwawezesha wananchi kuwa na afya njema itakayowasaidia kuwa na nguvu ya uzalishajimali ili kufikia uchumi wa viwanda.

Pamoja na hayo aliwataka Wazazi kutokuwa na hofu juu ya chanjo hii kwani ni salama na haina madhara yoyote ya kiafya

"Wakina mama, naomba mfahamu kuwa chanjo hii imefanyiwa utafiti wa ndani na nje ya nchi hivyo haina madhara kwa afya zenu" amesema makamu wa Rais

Katika hatua nyingine Makamu wa Rais amewapongeza wadau wa Maendeleo wa Jiji la Dar es Salaam kwa juhudi zao za kushirikiana na serikali katika kutoa huduma za jamii lakini pia kuitambua kampeni ya ''Afya yangu Mtaji wangu'’.

Akizungumza katika zoezi hilo,Waziri wa Afya Maendeleo ya Jamii Wazee Jinsia na Watoto Dr. Ummy Mwalimu amesema'' kwa mwaka 2018 wameanza kwakutoa chanjo hiyo kwa watoto wenye umri wa miaka 14 na kuanzia mwakani wataongeza dozi hiyo hivyo kuanza kuwachanja watoto wa kuanzia miaka 9''.

Dkt. Ummy amevitaja visababishi vya saratani hiyo kuwa ni virusi vijulikanavyo kitaalamu kama Human Papiloma Virus (HPV) ambacho kinaua wanawake wengi katika nchi zinazo endelea na kuambukizwa kwa njia ya ngono.

"Ndugu zangu wakina mama mnapoona dalili yakutokwa na uchafu au damu katika sehemu za siri au kuingia katika hedhi bila mpangilio maalumu ni vema ukachukua hatua za haraka kwa kuwaona wataalam wa afya" amenukuliwa Dkt. Ummy.

Ummy amesema tafiti zinaonyesha kila wanawake 4 wanaoshiriki ngono 3 wanapata maambukizi ya HPV wakati fulani wa maisha yao hivyo jukumu inalo chukua Serikali kwa sasa ni kupambana kwa kutoa chanjo kwa waschana wenye umri mdogo ili kuepusha maambukizi katika umri mdogo.

Katika zoezi hilo lilihudhuriwa pia na Mkuu wa Mkoa wa Dar Es Salaam Mh:Paul Makonda, Mkuu wa wilaya ya Temeke Mh:Felix Lyaniva na wageni mbalimbali. ambao kwa pamoja kila mmoja kwa nafasi yake alioneka kuwahimiza wananchi kujitokeza katika zoezi hilo na mengine yanayo husu afya zao.

WANANCHI WAZIDI KUNUFAIKA NA MIRADI INAYOTEKELEZWA NA TEMEKE.

Mwenyekiti wa CCM  Mkoa wa Dar es salaam Mh.Kate Kamba pamoja na madiwani wa Chama Cha Mapinduzi wafanya ziara Manispaa ya Temeke na kukagua miradi ya maendeleo pamoja na ukaguzi wa utekelezaji wa Chama Cha Mapinduzi na kuwakumbusha wajumbe wa chama hicho kimeelekeza serikali kutumia nguvu zake zote kuendelea kupambana na changamoto zote zinazowakabili wananchi. Katika ziara yake ndani ya Manispaa ya Temeke, amepokea taarifa ya utekelezaji wa ilani ya chama hicho ya mwaka 2015-2020 iliyotolewa na Mkuu wa Wilaya ya Temeke Mh. Felix Lyaniva alisema ''Tunaendelea kutekeleza ilani ya Chama Chetu kwa kuhakikisha tunawafikia Wananchi katika nyanja zote za maendeleo kwa ukaribu zaidi''.
Kuhusu utatuzi wa kero za wananchi Mh. Lyaniva amesema wilaya inaendelea kutatua kero mbalimbali za wananchi hivyo kufanikiwa kwa kiasi kikubwa kupunguza kero za wananchi. Pamoja na hayo kumeanzishwa dawati la kushughulikia kero hizo za Manispaa ambapo imeongeza saa moja zaidi baada ya muda wa kazi ili kuwafikia Wananchi wenye matatizo kwa ukaribu zaidi. Ili kuhakikisha Wananchi wanatatuliwa matatizo yanayowakabili kwa haraka ofisi ya Mkuu wa Wilaya imeanzisha utaratibu wa kusikiliza kero za Wananchi kwa kata kila baada ya miezi mitatu.
Aidha Mh. Lyaniva ameelezea mradi wa maendeleo ya Jiji la Dar es Salaam (Dar es salaam Metropolitan Development Project-DMDP) kuwa Temeke ni miongoni mwa Halmashauri zinazotekeleza mradi huo kwa Mkopo toka benki ya Dunia na kusimamiwa moja kwa moja na Ofisi ya Rais TAMISEMI.
Akifafanua kuhusu Utekelezaji wa ilani ya CCM aliwaeleza wajumbe kuwa Halmashauri imechangia TZS 20.3Bilioni kwa ajili ya kulipa fidia wananchi wanaopisha ujenzi wa miundombinu ya Mradi huo. Alisema ''Mradi wa DMDP ni miongoni mwa miradi ya kimkakati ambayo lengo lake ni kuboresha miundombinu mbalimbali ya Jiji letu''.
Katika ziara yake Mwenyekiti huyo ametembelea miradi mbalimbali na kuelezwa kuhusu miradi ya Ujenzi wa Masoko sita ya kisasa na vituo vya mabasi vitano, ujenzi wa mifereji mikubwa ya maji ya mvua yenye urefu wa zaidi ya 8.5km, uwekaji wa taa katika mitaa yote inayoguswa na mradi, Ujenzi wa kituo cha Afya cha Kata ya Buza, Ujenzi wa Uwanja wa Mpira wa kisasa katika Kata ya Makangarawe, Ujenzi wa Barabara za lami zenye urefu wa zaidi ya Kilometa 95 pamoja na kuboresha mfumo wa ukusanyaji Taka Ngumu.
Katika kukamilisha ziara hiyo Mh Kamba alitoa shukrani kwa Wilaya kwa utendaji na ufanisi katika Utekelezaji wa Ilani ya Chama Cha Mapinduzi. Huku akiisifia Manispaa ya Temeke kuwa wamejitahidi kuweka wilaya hiyo katika hali ya usafi na kuwataka kuendeleza juhudi na kutoa Elimu kwa Umma kuhusu masuala yote ya Usafi.

Uzinduzi wa Chanjo ya saratani ya shingo ya kizazi

TEMEKE YA KIJANI

WANAFUNZI WANEEMEKA UMITASHUMTA

Mkurugenzi Mtendaji wa Manispaa ya Temeke Ndugu Nassibu B Mmbaga amepokea msaada wa vifaa vya michezo toka National Microfinance Bank (NMB). Akikabidhi vifaa hivyo vya michezo Bib:Christian Lifiga amesema ''tumekuwa tukiunga  jitihada za makamu wa Rais Mh: Samia Suluhu za mazoezi kwa afya bora hivyo tumenunua vifaa vya michezo ili kuboresha Afya za wananchi''.

Akishukuru kwa msaada wa Vifaa hivyo Mmbaga alisema vifaa hivyo vitawasaidia katika michezo ya UMITASHUMTA inayotarajia kuanza mwezi  Aprili mwaka huu. Aliongeza kupitia utoaji wa vifaa hivi inatupa nguvu kwamba michezo inatuleta pamoja.

Naye afisa elimu Msingi Temeke Bib: Dafroza Ndalichako aliwashukuru NMB kwa kuona umuhimu wa michezo hata kuwakumbuka Temeke,hata hivyo amewaomba wadau wengine kujitokeza ili kuunga mkono juhudi za serikali katika sekta mbalimbali.

Vifaa vilivyotolewa ni jezi za michezo zenye thamani ya shilingi milioni mbili na laki mbili. Zitasaidia timu za shule ambazo zitashiriki michezo zitashiriki michezo ya UMITASHUMTA kiwilaya. Ambapo michezo hiyo kitaifa itachezwa jijini Mwanza.

TEMEKE KUHIMARISHA ULINZI WA MTOTO

Kitengo cha Ustawi wa Jamii katika Halmashauri ya Manispaa ya Temeke kimeamua kuweka mazingira rafiki ya kumkuza mtoto ili kumhatarisha na majanga mbalimbali yanayojitokeza katika kipindi chote cha ukuaji.

Matarajio hayo yalijadiliwa katika kikao cha taarifa ya ulinzi na usalama wa mtoto kilichofanyika katika ukumbi wa Iddi Nyundo uliopo Manispaa ya Temeke. Kikao hiko kiliudhuriwa na Naibu Meya wa Manispaa ya Temeke Mh; Rajabu Mkenga wa kata ya Miburani ambaye alikua Mwenyekiti wa kikao,waheshimiwa madiwani,wakuu wa Idara, maafisa Ustawi wa Jamii,timu ya ulinzi na usalama ya mtoto,Polisi na Magereza.

kikao hicho kilijadili taarifa ya kitengo cha ustawi wa jamii kwa mwaka 2017/2018 shughuli zote zilizofanyika, ikiwemo kuwapatia malezi mbadala watoto 30 waliofanyiwa ukatili,kuwaonganisha watoto 40 na familia zao,kutoa msaada kwa familia 7 zilizopata watoto zaidi ya wawili kwa mpigo n.k Pia kikao kiliangalia mafanikio na changamoto wazipatazo katika kitengo.

Alipokua akitoa mafunzo ya namna yakumlinda mtoto katika jamii yetu,afisa ustawi wa jamii Bib;Lilian Mafole ameitaka jamii kushirikiana na dawati la familia na watoto ili kuzungumza changamoto wanazokutana nazo watoto katika jamii nzima.Bib Mafole alisema

''watoto wanachangamoto mbalimbali, ni lazima sisi tunaowazunguka tuwasikilize ili tuweze kuzitatua''.

Alitaja baadhi ya changamoto wanazokutana nazo watoto ni pamoja na kulawitiwa na ndugu zao,ndoa za utotoni,makundi hatarishi n.k. Pia aliwaomba wazazi kutokua chanzo cha kuharibu watoto kwa kuendeleza migogoro katika familia.

Pia aliwaomba madiwani kusaidia kutoa elimu kwa wananchi juu ya malezi bora katika ngazi ya familia na jamii ili kupunguza matukio ya ukatili na vitendo vya unyanyasaji wa watoto.

Katika hatua ingine afisa ustawi Bib;Saraha Nzelwa alitoa elimu  ya mfumo wa DHIS2(District Health Informationn System) ambao kwa sasa unatumika kwaajili ya ukusanyaji na kutunza taarifa za watoto waliofanyiwa ukatili na unyanyasaji ,wanaokinzana na sheria na walio kwenye hatari ya kukinzana na sheria. Mfumo huo umekua ukirahisisha upatikanaji wa takwimu za watoto katika Manispaa ya Temeke. Papohapo mtaalam mwezeshaji kutoka chuo kikuu cha Dar Es Salaam (UDSM) Bib;Happy Nyanda aliwapitisha madiwani katika mfumo huo, nakuonesha kiuhalisia namna unavyofanya kazi.

Aidha Mh;Mkenga aliwashukuru kwa mafunzo ambayo wameyapata katika kikao hicho,pia aliwapongeza kwa dhati kitengo cha ustawi wa jamii kwa namna wanavyofanya kazi kubwa yakufatilia mienendo ya ukuaji wa watoto katika jamii pamoja na kuchimbua matatizo wanayokumbana nayo watoto katika makuzi yao.Aliahidi kuungana nao ili kuweza kutatua changamoto ambazo zinajitokeza ikiwemo upungufu wa bajeti.Hivyo amewataka wazazi kutokukimbia majukumu yao ya kuhudumia na kulea watoto.Ameitaka jamii kutoa ushirikiano wakutosha kwa vyombo husika ili kufichua maovu yote na ukatili unaofanywa kwa watoto.

Dawati la familia na watoto linatekeleza shughuli za watoto kwa kushirikiana na wadau mbalimbali kama UNICEF,JSI,PACT,Baba watoto,WEI,WLAC,YCRC,Salvation Army,Pasada, Compassion,sekta za kiserikali mfano,Madawati ya jinsia,polisi,makao ya watotot ya watu binafsi,hosptali,maendeleo ya jamii,elimu msingi na sekondari,magereza,mahakama na huduma kwa jamii.

TEMEKE YA KIJANI

Katika kuadhimisha siku ya upandaji miti kitaifa, Manispaa ya Temeke imeitikia kauli hiyo kwa kupanda miti 500 katika shule ya sekondari ya St.Augustine iliyopo Buza inayomilikiwa na kanisa la Anglikana Dayosisi ya Dar Es Salaam.

Zoezi hilo ambalo limesimamiwa na mawakala wa huduma  za misitu kutoka kanda ya mashariki na ngazi ya Wilaya ya Temeke(TFS) kupitia Idara ya Misitu. Pia maadhimisho hayo yalihudhuria na watendaji  wa mtaa, mwenyekiti wa mtaa wa buza,viongozi wa dini,wananchi na mkuu wa shule wa St.Augastine pamoja na  walimu na wanafunzi  wa shule hiyo.

Sherehe hizo zilipambwa na mgeni rasmi ambaye ni katibu Tarafa wa Mbagala Bib;Bertha Minga ambaye alimwakilisha Katibu Tawala wilaya ya Temeke Bwn; Hashim Komba.

Bib;Minga alisisitiza upandaji wa miti katika makazi ili kuleta mwonekano mzuri wa mazingira. Pia aliwataka wananchi zoezi la upandaji miti liwe endelevu, ili kurudisha uoto wa asili ambao ulipotea.  Minga alisema ''kutunza mazingira ya kwa kupanda miti ya kutosha ilikurudisha uoto wa asili ambao ulipotea''.  Pia alisisitiza misitu sio sehemu ya uhalifu,  itunzwe na kutumika vizuri kwa ajili ya maendeleo ya Tanzania ya viwanda. Aidha Bi;Minga alipanda miti kama ishara ya kuadhimisha zoezi hilo. Pia aliwapongeza TFS Wilaya ya Temeke kwa jitihada zao za kupanda miti maeneo mbalimbali ya Temeke.Amewahamasisha wadau wengine kujitokea na kupanda miti ili kuboresha mazingira asilia ya wilaya hiyo.

Mamlaka ya huduma za misitu(TFS) wilaya ya Temeke kwa miaka mitatu imeweza kupanda miche 5000 katika maeneo mbalimbali katika Wilaya ya Temeke. Kwa mwaka 2018 imepanda miche 1200 ikiwemo miche ya matunda.

Sherehe hizi zinaadhimishwa tarehe 1 mwezi wa 4 kila mwaka ,ambapo kauli mbiu ya mwaka huu ni;

''Tanzania ya kijani inawezekana tupandeni miti kwa maendeleo ya viwanda''

TEMEKE YAZIDI KUDUMISHA UHUSIANO NA HALMASHAURI ZA VISIWANI ZANZIBARI

Halmashauri ya Manispaa ya Temeke imepokea ugeni kutoka Halmashauri ya kati (Wilaya ya kati) kutoka Zanzibar. Ugeni huo wenye lengo la kudumisha uhusiano wa halmashuri zote mbili. Ushirikiano huo uliodumu tangu mwaka 2000 wenye lengo la kuleta maendeleo ya kijamii katika halmashauri hizo.

Ujio huo uliambatana  na watendaji, madiwani na wachezaji kutoka Halmashauri  ya kati Zanzibar. Ugeni huo uliongozwa na Meya wa Halmashauri ya Zanzibar Mh; Said Mtaji Askari pamoja na Mkuu wa Wilaya ya Zanzibar.

Katika kusheherekea sikukuu ya Pasaka ilichezwa michezo mbalimbali katika uwanja wa Azam Complex uliopo Chamazi. Pia ilichezwa mechi ya kirafiki ya mpira wa miguu kati ya Madiwani wa Temeke na Madiwani  kutoka Halmashauri ya Zanzibar ambayo  ilikua kivutio kikubwa kwa watazamaji,ambapo matokeo yalikua sare kwa magoli 4-4. Pia timu ya wanawake ya mpira wa kikapu ilicheza ambapo timu ya wanawake ya watumishi ili ongoza kwa magoli yasiyo na idadi.

Kabla ya ufunguzi wa michezo hiyo yalifanyika mazoezi ya viungo(aerobic) ambayo yalihusisha wanamichezo wote. Ambapo watumishi wa Temeke walionekana kuwa na nguvu na pumzi kubwa.

Hadi kufikia mwisho wa michezo hiyo hakuna aliyepata majeraha na michezo ilikwisha salama.